絲絲講場：阿里攻韓好事近
阿里巴巴集團主席馬雲無疑係近期嘅風頭躉，呢排佢嘅風頭吹到去南韓，連總統朴槿惠都見埋，冇理由冇搞作嘅！
馬雲朴槿惠密斟合作
南韓媒體就估，朴槿惠想借阿里嘅巨型平台，開拓中國嘅電商市場。其實馬雲一早都想去南韓發展，今次雙方都借會面表明心迹，唔知係咪真係好事近呢？
朴槿惠尋日喺青瓦台接見馬雲。據聞佢哋交換合作意見，包括中韓兩國嘅電子交易、遊戲、影視等領域。內地媒體仲話，喺會見過程中，兩位仲交流中韓兩國點樣提高電子交易系統同物流效率，仲有產品認證服務等領域，仲話為展開合作達成共識。
或拍三星搞智能眼鏡
朴槿惠仲想阿里為南韓中小企業進軍中國電子商務市場行個方便。
早喺上個月，馬雲都去過南韓一趟，據聞係同三星高層商討智能眼鏡合作。睇嚟，馬雲早就睇中南韓市場，想大展拳腳。
講起影視娛樂，阿里早前宣布，旗下數字娛樂事業群阿里數娛與海爾電視推出智能電視。新推出嘅智能電視，仲可以支援淘寶網購，真係百足咁多爪喎。
余絲韻