Market Insight：內銀業績有啟示

上周五恒生指數公司公布季檢結果，儘管恒指50隻成分股維持不變，但「去大笨象化」的工作就繼續進行，繼成分股由33加到50隻之後，會分階段把單一成分股佔指數比重上限，由15%降至10%。睇番重磅成分股滙控（00005）佔比逾14%外，第二、三位的騰訊（00700）及中移佔指數比重均低於一成，話新措施衝着滙控而來，並不為過。

滙控影響力早減弱

周末睇到唔少分析，講到滙控今鋪實畀基金隊到開花，真係唔識就嚇死，識就笑死。過去五年，滙控經歷有波幅無升幅的悶局，基本因素欠佳，管理層焦點去槓桿化，少做少錯的策略，大型基金對佢興趣經已唔大，股價大部分時間在60至90元之間浮浮沉沉，主動基金揸重貨可能性微乎其微。

古勝冇點你2014/08/19

萬里長空

況且，不少主動基金本身就有單一股票佔基金投資上限不高於一成的持貨限制，實際來自主動基金的貨源斷估有限。至於盈富基金（02800）一類的被動基金，今次措施講明未來一年分五次進行，由14%降至10%。美銀美林計過，每1%變動，照單執藥的被動基金要減持1.3億美金，講緊10.1億港紙咁上下，約等只係平均一日成交額，有一季時間消化，淡友真係唯恐天下不亂。

今次涉及改例，仲包括以後可以將房地產信託基金（REITs）加入成分股。睇番三隻本地最大市值的REITs，領匯（00823）、冠君產託（02778）及匯賢產託（87001），市值分別1,041億、203億元及177億人仔，「晒士」拋離其他REITs幾條街的領匯，下一季檢納入成分股的機會是呼之欲出。

領匯入閘要踢股走

由於現時成分股50隻名額額滿關係，意味領匯入去就有股份要被踢出，市值細過領匯的藍籌股有12隻，分別係華潤置地（01109）的985億元、利豐（00494）的846億元、新世界（00017）的836億元、信置（00083）807億元、百麗（01880）的816億元、東亞（00023）的777億元、蒙牛（02319）的755億元、招商局（00144）的662億元等。

當中蒙牛、百麗及潤地是近四年半先加入，業務又無重大變化，斷估唔會咁快被踢走，正路睇招商局被踢出是正路，亦唔排除地產換地產，將新世界或信置換出騰出空位。事實上，兩隻上世紀已經躋身成分股的地產商，都曾經在○三年被換出，○五年再度染藍。

講番個市，查實中移業績到底有乜咁令人振奮？除估值夠平，基金經理under weight得太耐促使補倉潮之外，搵唔到更好理由去解釋。

有趣是，同樣夠平，在內銀股卻係無運行，好似重農行（03618）中期業績，中期純利升11.6%，比市場預期低1至3%左右，但資產質素轉差情況持續，出嚟效果卻係完全兩個故事，股價跌6%收報3.76元，返到八月初的起步位，中期賺36億人仔，大行估全年66億人仔左右，計落PE得4.1倍，市場對不良貸款上升，以及利率逐步市場化，對下半年息差的影響，睇法仲係好悲觀，四大行業績，今日由中行（03988）揭開序幕，大家不妨留意。

滬港通推廣漸上力

A股市場向以散戶為主要參與者，內地股民喜愛聽消息炒二三線股，以致股仔可以炒到上天價，大型藍籌股估值卻落後於H股。為了提振藍籌估值，聽聞由九月一日起十四個交易日，14家在上海交易所上市的銀行將輪流展開路演，講解中報表現。

事實上，滬港通推出，相信機構投資者乃滬股通的主要參與者，投資對象亦自然係有基本因素有估值可循的大型藍籌股。滬上市銀行股此時積極展開路演工作，看來正是要為滬股通做好準備。未來一個多月港交所（00388）會否就港股通推出類似的推廣活動，不得而知。從另一角度看，兩地積極籌備滬港通之際，相信利好氣氛將維持一段時間，淡友即使堅持唔持貨，亦不要急着估頂開淡倉。

古勝