絲絲講場：轉板後首放榜 萬科兩頭走
萬科企業（02202）即將公布上半年業績，今次係B轉H後，第一次搞業績記者會。萬科將會喺一日之內見晒中港兩地記者同分析員，絲絲聽講，嗰日管理層會風塵僕僕趕嚟香港，連Lunch都無時間食。
一日見晒中港老記
萬科會喺十七號公布業績，記者會亦會跟手喺十八號舉行。絲絲記得，萬科未轉H股前，佢哋會先喺內地搞業績會，之後第二日先會嚟香港見傳媒。聽萬科老友講，今次公司喺兩地同日開記者會，係想喺香港上市之後，兩邊公布嘅訊息更公平。
萬科管理層星期一朝早九點半見內地分析員，緊接就係內地媒體，完咗就嚟香港見記者，再到分析員。絲絲聽到都覺得忙到暈，但係班管理層覺得一日搞掂有效率啲。
余絲韻