iOS與Android主宰手機同板腦作業系統（OS），但市場求變嘅聲音亦都唔少。就好似由Nokia前Meego團隊成員創辦嘅Jolla為例，單憑OS新勢力嘅威名，第一款手機就喺主場芬蘭賣到滿堂紅，而呢款新機喺香港面世喇。
Jolla聯席創辦人兼董事局主席Antti Saarnio就同絲絲爆料，話Jolla可能會搞埋板腦，仲話有可能會夥拍內地電商巨頭，將Jolla手機同埋Sailfish OS打入內地市場添。
Jolla嘅首款手機，尋日透過和電香港（00215）旗下3香港以2,888蚊喺香港獨家開賣，部機得4.5吋及雙核配置。雖然淨係靠網上宣傳，但係訂購反應奇佳。Antti Saarnio話，除咗手機之外，Jolla唔排除會推平板電腦等唔同尺寸嘅智能產品，同埋會開放Sailfish作業系統畀其他生產商。
Antti Saarnio仲話，Jolla手機好快會透過印度最大嘅電商網站開賣，內地市場當然係下一步嘅目標啦。
至於會唔會同內地電商巨頭合作，好似阿里巴巴或騰訊（00700），佢就笑笑口話「可能啦」。講到會唔會同傳聞一樣，已獲和黃主席李嘉誠入股，佢話「唔會評論」！
作為內地IT巨頭嘅聯想（00992）不甘示弱，近日同聯通（00762）合作，一口氣喺內地推出4款TD/FD雙模4G智能手機，售價799至1,599元人仔，單睇個價好有競爭力。
余絲韻