絲絲講場：商品大王撈埋港股？

一向唔多講股市睇法嘅羅傑斯，加盟創業板股份首華財經網絡（08123），尋日隻股升咗2.60%，至0.395元。追查番之前啲相關新聞，原來上個禮拜二首華已透露同羅傑斯傾緊，有意請佢做非執董，嗰日隻股仲暴升9%。

擬授出6千萬股權

今次首華正式發咗通告，建議委任羅傑斯擔任首華財經非執董同埋深圳前海首華高級顧問，條件係該公司會向羅傑斯授出共6,000萬股股權，分開三年每年2,000萬股授出。依家等緊公司股東特別大會同股東批准！

首華財經係一間多元化金融服務機構，業務包括證券及期貨買賣及企業融資等。聯營公司深圳前海首華早排同建行（00939）訂立電子商務支付服務合作協議，又同平安期貨合作。

今次仲傾掂咗「商品大王」，講明日後准許羅傑斯喺任期內，每年以行使價認購該公司已發行股本嘅最低1%，及2,000萬股每股面值0.01元嘅普通股。

絲絲相信，羅傑斯今次肯答應，當然要有佢嘅理由！一般散戶都可以跟風炒兩轉。

余絲韻