絲絲講場：穆迪：人口老化殺埋身
中國人傳統觀念係「家有一老，如有一寶」，但如果放喺經濟大環境，評級機構穆迪似乎唔係咁樣諗！呢間行出咗份報告，話人口老化問題會令到全世界嘅經濟增長減速，對香港經濟嘅影響仲特別嚴重，份報告話，到咗二○二○年，香港每3.8個工作人口就要供養一位老人家，到咗二○五○年每一個半工作人口就要供養一位老人家，都咪話唔大壓力！
港經濟增長恐1%都冇
講起人口老化，亞洲四小龍都係難兄難弟，穆迪估計香港會喺二○二五年之前加入超老齡化地區行列，即係話全城至少兩成人口都係老人家，到時喺咁多個超老齡化地區之中，香港、南韓、新加坡同埋中國嘅經濟增長跌得最勁，香港嘅增長速度話唔埋連1%都冇。
唔只香港嘅成年人供養老人家壓力愈來愈大，南韓都不遑多讓，穆迪話到二○二○年，南韓每4.6個工作人口就要供養一位老人家，到咗二○二五年亦係每一個半工作人口就要供養一位老人家，即係話南韓嘅人口老化都好快吓！
余絲韻