Market Insight：港交所候調整分注買

昨日兩隻藍籌成跌市奇葩，其中一隻係中移（00941），升1.6%，收報86元。另一隻係獲多家大行唱好的港交所（00388），股價創逾三年新高179.5元，收報177.6元，升1.7%。市場對滬港通帶動港股交投上升寄予厚望，而這份良好的願望亦直接投射在港交所的估值上。

不過，現時港交所估值經已稱冠於亞太區市場同類股，以現價計，今明兩年預測市盈率分別達到39倍及29倍，相信短線股價升至180元樓上會開始見到較大的獲利回吐壓力，但長線股價應不止於此。若然未有貨又想買貨，可以等候調整出現再分注行事。

古勝冇點你2014/08/08

萬里長空

國企改革如火如荼

今年下半年魚缸有兩大主題，第一個係缸邊友每日掛在口邊的滬港通，另一個就係國企改革。昨日傳來國資委網站披露，重慶混合所有制推出百個項目，提速國企集團股權多元化、引導各類資本參與國企改制重組等，力圖以「混合」發展激發國企活力。

消息一出，個別與重慶相關的H股有反應，平時在鋼鐵股板塊表現唔多活躍的重慶鋼鐵（01053），昨日表現跑贏鞍鋼（00347）及馬鋼（00323），一度高見1.87元，收報1.85元，升5.7%，成交達4,550萬元。

事實上，國企效率偏低、浪費資源的同時，更係貪腐溫床，成為經濟改革的重大障礙。現屆政府雷厲打貪，並決心落實推動國企改革。早前國資委開展國企改革「四項改革」試點工作，選取了六家央企進入首批試點範圍，便屬例子。繼上海表示用五年時間完成國企改革、重慶落實推動國企改革外，最近粵省政府高層亦對省屬企業進行調研，督辦國有企業改革工作。可以預期，陸續有更多地方落實關於國企改革的相關措施。

買樓投資最好忍手

目前北控（00392）兼營城市燃氣、水務、啤酒、環保及廢物處理四大核心業務，瓣瓣都能獨當一面，分拆業務、釋放資產價值的條件存在，但是否作考慮則屬後話。反觀其母公司北控集團，與首創集團同屬北京旗下國資集團，早幾年確曾傳過當局擬整合兩大集團，但之後又唔見任何聲氣。

目前談北控回歸內地A股上市，條件似乎未成熟，但北控集團或首創集團來港整體上市的可能性則存在。總而言之，當其他主要城市都相繼動手，相信北京市落實整合國資的行動為時應不遠。

差餉物業估價署數據顯示，六月份的私人住宅售價指數連升三個月兼創歷史新高，住宅租金指數亦連升四個月，上半年細單位售價升幅達2.5%。睇見呢堆數字，可以感受到近幾年賣咗樓轉租，聽聽話話唔好冒險入市的用家如何傷透心！

到底依家應唔應該買樓，古勝認為，若然係自用，有首期的話買亦無妨，反正息口回升都唔會一步到位，而利息上升租金亦會跟升，自置居所免煩惱。但若然已有居所，買樓只係投資行為，咁就最好忍吓手，反正唔買樓可以買股票，依家細價樓樓價高企，加上政府積極增建「限呎房」，未來細單位供應將大增，從投資角度出發，亦唔見得值博。

博金價彈寧揀ETF

板塊方面，金價反彈上每安士1,300美元樓上，刺激金礦股逆市做好，招金礦業（01818）升3.86%，中國黃金國際（02099）升1.75%，靈寶黃金（03330）升7.4%，紫金礦業（02899）無升跌。

地緣政治出現不穩定因素，資金流入金市，帶動金價有所反彈不足為奇，但基於美元走勢及環球市場風險胃納，暫不見得會成為一個中長期趨勢。只是，從一一年開始金礦股估值遭下調，至今板塊內股份估值普遍已回落至具支持的水平，估計未來一年業績及估值趨穩，一六年才進入復甦期。

當然，金礦股表現除了金價之因素外，更重要的是企業本身的業務經營以及管治情況，涉及上中下游產業鏈，影響毛利率表現因素複雜，實在難以單純因為金價短線波動而就下買金礦股的決定。若看官看好金價未來走勢，在下認為黃金ETF也許是更直接可取之選擇。

古勝