香港地少人多，中環係黃金地段，寫字樓租金出名貴甲級商廈更係非常渴市。不過，港交所（00388）最近就執到筍嘢！
話說港交所嘅大本營，一向喺中環地標嘅國際金融中心一期10至12樓，港交所喺國金嘅租約本來明年才到期，但港交所卻提早約一年續租，事關租金有得慳，除咗租金比市價平外，兼且仲有免租期，計計埋埋慳番唔少，仲唔係執到筍嘢？
聽聞港交所會續租六年，每月租金約711萬元，按3層約6萬平方呎計，平均呎租約118.6元，較國金現時平均呎租約130至140元，平咗足足12%。港交所發言人承認續租，但就話續租係商業安排，唔會透露續租細節。
其實喺「滬港通」效應下，中環優質商廈寫字樓可能更加渴市，事關有好多中資證券行可能會殺入中環，諗住吸納多啲香港客買A股。
有中資經紀同絲絲講，以往在港中資行主力做內地客，但喺「滬港通」下，覺得香港尤其係機構投資者買A股嘅潛力好大，所以紛紛部署擴充門面，吸香港客，令中環寫字樓需求更大。
余絲韻