全球最大社交媒體公司facebook（fb）日前出爐嘅業績好靚仔，股價周四急漲5.2%，收報74.98美元，打破咗三月時舊紀錄72.03美元，帶挈創辦人朱克伯格身家水漲船高，呢回「朱仔」變「肥豬仔」囉。
據彭博社億萬富豪指數顯示，佢身家單日進帳16億美元，至333億美元（約2,597億港元），全球排名第十六位，壓過排名十七、十八位嘅Google兩位創辦人布林及佩奇，同埋二十位嘅亞馬遜舵手貝索斯。
講真fb股價上升已唔係新鮮事，佢股價過去十二個月漲升183%，成為標指成分股之冠，遠遠拋離Google期間嘅7.5%升幅，目前市值昂然邁向2,000億美元大關。撰寫《The Facebook Effect》一書嘅作者David Kirkpatrick就話，「朱仔依家先至起步，相信他將成為全球最有錢嘅人。」
朱仔究竟點先成為全球首富？依家穩坐呢個寶座嘅微軟創辦人蓋茨，財富高達847億美元，即係朱仔嘅身家要差唔多再漲兩倍，不過朱仔最大嘅本錢係青春，依家先三十歲，大把時間去追啦！
余絲韻