你咪睇海洋公園係香港歷史悠久兼咁成功，其實呢種主題公園模式，早就喺中國大陸同好多亞洲地區落地生根。依家內地人消費力愈來愈高，有錢都想寶貝仔女開心吓，帶佢哋入主題公園玩番一日半日。
好似上市公司海昌控股（02255）咁，依家係內地最大嘅海洋主題公園營運商，絲絲睇吓佢尋日份公告，佢旗下六個主題公園今年上半年入場人次加埋超過三百萬，比舊年同期升咗大概18%，增長速度分分鐘勁過香港海洋公園。
睇番香港海洋公園舊年有成770萬人次入場，又創紀錄，不過都只係升咗9%，講增長速度就比唔上內地嘅主題公園囉！
其實，香港海洋公園舊年遊客中，差唔多一半都係內地客，依家國內嘅主題公園愈開愈多，質素仲愈來愈高，香港海洋公園要留住班內地客，仲點敢怠慢。好似上個月就有號稱全亞洲最大鯊魚館之一嘅「尋鯊探秘」揭幕，令成個香港海洋公園嘅內容更加豐富，咁樣先唔會被內地嘅主題公園咁輕易趕上嘛！
余絲韻