Market Insight：吉汽最壞時刻已過

港股近日陰陽怪氣，急跌365點後，昨日在不足百點波幅下，僅反彈62點收報23,238點。內地六月出口增長7.2%，較五月的7%只有小幅度改善，但卻遠比市場預期的10.4%增長差，限制港股反撲，主板成交回落至476億元，是六月二十五日以來最低，反映對後市審慎的人士，並不孤單。

金管局再度出手，向市場注入港元，避免港匯衝穿7.75算。以往港匯強勢，或多或少利好股市，今次港股既不旺財也不旺丁，更古怪是，港匯拆息近日不跌反升（升幅唔大，但卻高於五、六月水平）。

古勝冇點你

萬里長空

熱錢湧港目的不明

到底新一波熱錢湧入香港，既不炒股，亦唔係炒磚頭，最終所為何事？有人話葡萄牙又有銀行出事，怕歐債危機翻炒故湧入港元避難，可是，昨日見除葡債外，其他歐洲國家債全線硬淨，古勝真係毫無頭緒，到底今次故事點發展，只能放長雙眼，等謎底水落石出。

新華製藥（00719）發盈喜，預期上半年業績有6.8至7.3倍增長。睇番一三年上半年，其盈利基數相當低，僅499萬元人仔，難怪有如此誇張的復甦。亞洲水泥（00743）亦發盈喜，估計半年盈利有40%以上增長，主要歸功於銷量及產品售價向上。

睇番亞泥去年上、下半年業績各賺2.56億及5.67億元人仔，「頭輕尾重」的情況同龍頭股海螺水泥（00914）相若，不過後者盈喜估緊上半年業績大升九成，比較下，亞泥唔算相當有驚喜也。

近期寫過幾次汽車股，獨漏吉利汽車（00175）無提過。早兩日公司公布的銷售數據，六月份銷售3.13萬輛，按年跌10%，當中內銷及出口分別佔2.56萬輛及5,708輛，按升微升1%及下跌39%，上半年累積計，總銷量按年跌29%至18.71萬輛，只能完成管理層一四年訂下58萬目標的三成二。

重整品牌值得期待

與今年上半年，內地乘用車銷量按年錄得11.2%增幅比較，今年吉汽內銷及出口分別倒退28%及35%，表現都差過大市，一來公司正進行營銷系統重組，以及新車型進入更新周期所累。

事實上，同兩隻古勝喜歡的華晨（01114）及東風（00489）比較，年初至今兩股累積升22.3%及15.4%，新能源概念推波助瀾的比亞迪（01211）亦升22.5%，反觀吉汽跌緊21.3%，股市已說明一切。

面對中外合資品牌競爭，近年多時間，內地自主品牌的市佔率有流失迹象，吉汽採取四合一策略，取消帝豪、全球鷹及英倫，集中資源發展主打的「Geely」品牌，亦因此對銷售構成影響。值得留意，吉汽股價五月中低見2.6元後，近期再出疲弱銷售數據，對股價的衝擊似有還無，吉汽似逐漸站穩陣腳，看來已經有春江鴨密切留意。

重組後，下半年幾個新款好似GX9、KC都被市場睇高一線，明年公司推plugin混燃車系，會唔會食正環保概念，不妨拭目以待。由半年銷售，綜合25.94億元人仔的盈利預測似乎有點太樂觀，不過，吉汽最壞時間應該過咗，2.6元即使不是中期低位，相信亦離此不遠。

神數復甦進程緩慢

正當呢幾日唔少股仔起動，見到有個別昔日基金愛股股價走晒樣，好似隻神州數碼（00861）股價連跌三個交日，昨日曾低見6.74元，收報6.75元，跌6.25%，成交增至4,437萬元，現價已逼近上月所創的52周低位6.63元。

雖然近年神數積極進行戰略性轉型，強攻「智慧城市」及拓展金融業務，但至今相關業務貢獻相對有限，現有系統業務銷售及分銷業務銷售雖有改善，但尚未確認展現持續性的復甦勢頭。

看來，今次公司實現的戰略性轉型難度較以往大，在不明朗因素揮之不去下，基金沽貨轉換持股對象，致使股價低處未算低，唔覺唔覺經已落到近五年之低位。若然季內公布的中期業績唔對辦，估值尚有下調壓力，在下認為目前仍未到撈底時候。

古勝