絲絲講場：fb落戶北京博Like
內地官方仍然未肯對Facebook（fb）解封，不過十三億人口嘅龐大市場絕對不容忽視，個個睇實Facebook幾時踏足呢片土地，尋日終於有消息話佢地「落戶」北京喇！不過，唔好開心得咁快，佢地只係租咗個寫字樓，係個可以遙望紫禁城嘅靚位。
月租料40萬 望紫禁城
Facebook原來喺今年五月，已經喺北京黃金商業區財富金融中心租咗個面積超過八百平方米嘅寫字樓，預備開設中國辦公室，仲要係一次過簽咗三年嘅租約，好明顯係為將來拓展內地事業版圖做準備。
其實Facebook CEO朱克伯格一向對進軍內地態度進取，唔單止自己去過中國好多次，仲話過，如果遺漏咗十三億人，就講唔上連接整個世界。
今次Facebook喺北京租嘅寫字樓位於黃金商業區，據聞仲可以遙望紫禁城，景觀一流。
絲絲計過，以財富金融中心每平方米五百蚊人仔嘅租金計，個寫字樓月租大約四十萬左右，對於水源充足嘅Facebook應該都係濕濕碎，如果可以靠個中國辦公室做好公關工作，得到內地官方放生，計落條數絕對有賺。
網民促設中國版試水溫
呢單Facebook北京設辦公室嘅新聞，尋日喺內地網站都成為網民討論焦點。有網民建議，喺未可以接通世界之前，Facebook可以先開返個中國獨立版試吓水溫，唔知朱克伯格會唔會考慮吓呢？