試諗吓你隔籬鄰舍住咗個影響全球經濟嘅大人物，係咪好有Face呢？不過，同聯儲局主席耶倫一齊，住喺華盛頓喬治敦Hillandale社區嘅人恐怕唔係咁諗，事關耶倫「坐正」後，專屬保安小隊經常出出入入，非常擾民，據居民形容已經到咗「信咩教都頂唔順」嘅程度！
《華爾街日報》報道，耶倫保安小隊不時喺佢住嗰條小路度開快車，荷槍實彈不特止，接載耶倫出入嗰部車仲差唔多7,000磅重，十分阻碇，日日停正喺鄰居家門前面起碼廿分鐘，走嗰陣仲衰到喺地面噴啲唔知咩液體，短短四個幾月就留低咗擦唔甩嘅污漬。
仲有呀，耶倫保安小隊租咗佢寓所附近一楝樓，然後喺天台裝咗個驟眼睇落似係街燈嘅攝錄鏡頭進行監視，搞到附近居民怨聲載道。
其實耶倫住喺Hillandale好幾年，對街坊亦幾友善，點解班居民依家咁唔「包容」？查實Hillandale環境清幽，背後就靠家家戶戶遵守嗰本50幾頁厚嘅社區規則，連種咩樹、牆身咩色、養幾多隻貓狗統統都有寫明，耶倫保安小隊又飛車又整污糟地方，唔乞人憎就假！
余絲韻