絲絲講場：「喬布斯」教人「射波」
世盃搞到好多人捱眼瞓返工，可以請假嘅都寧願請假。如果諗唔到點同老細講，不如參考吓喺電影《喬布斯》中飾演喬布斯、依家係聯想工程師嘅艾斯頓古查（Ashton Kutcher）咁寫封請假信，原來佢都係抄美國隊教練奇連士文。
呼籲老闆容許愛國
話說早幾日美國同德國硬撼，一旦輸波，美國隨時畀加納搶去出線資格。為咗呼籲美國舉國上下齊撐國家隊，奇連士文早前就喺Twitter上載咗請假信範文，建議打工仔同老細請假睇波。
有金色轟炸機稱號嘅奇連士文，都曾經係德國國家隊領隊。佢喺請假信範例度寫「雖然請假會影響公司生產力，但係美國隊面臨一場關鍵賽事，好需要全國上下支持，請容許員工放假。」
聯想楊元慶簽批放假
艾斯頓古查非常之「聽話」，攞咗封奇連士文簽咗名嘅請假信範本，加上自己個名，然後擺上Facebook呃Like，眼利嘅網民，發現佢老細楊元慶都冇簽名，質疑佢究竟係咪合法放假。好彩楊元慶只係唔得閒簽名，唔係唔批，佢好快就以「艾斯頓古查嘅研發工作好辛苦」為由，畀咗佢兩日假去捧美國隊場。
余絲韻