理財創富：iBank好搵夢想更重要
幾個投資學會嘅同學對投資興趣濃厚，畢業後有意投身iBank行列，但對於行內招募準則尚未清楚；加上近年各大投行都較傾向招聘海外回流嘅學生，令本地學生紛紛大喊「難搵工」！到底係咪單憑學術成績就可以突圍？加入iBank後又如何上位？
陸東：「個個都話iBank好好搵，一年起碼有幾千萬Bonus（花紅），咁你哋係咪真係鍾意金融先？無興趣就唔好讀喇！如果唔鍾意做，搵幾千萬嗰個唔會係你，三個月後畀人炒嗰個就係你！唔好嘥時間去追求人哋嘅夢想，要追求自己嘅夢想。你鍾意賣菜都得o架，賣得好，你都一樣會發達！」
工作能力靠良好表達
陸東曾出任瑞銀亞洲董事總經理，不時遠赴世界著名院校招攬人才，閱人無數。佢補充：「其實讀書叻同做嘢叻係兩回事，做嘢叻嘅人除咗基本功要打得好，亦好講求有良好表達能力，即係你識唔識Present自己同你嘅Idea，喺任何一個行業都一樣。回流學生嘅表達能力係比本地學生好，所以建議年輕人可以多啲參加辯論組或話劇組，把握機會訓練自己、接受挑戰，增強個人自信心。」
「呢啲嘢係要趁讀書時Train（訓練），出來做嘢之後就好難再Pick up（追上）。」
仲有，陸東記得曾經有個新人覺得份工太辛苦，返咗三日工就走。「喂，我哋做iBank，平均每星期返96個鐘，一星期七日，平均每日十幾個鐘，你見工時就應該預咗o架啦！」