孖妹Ｓ檔案：投資新秀向陸東學藝

Ken：你縱橫金融圈多年，投資眼光獨到眾所周知，要做個頂級基金經理，有咩揀股必殺技？

　陸： 我唔會因為股價升跌而買賣股票，投資唔應該着眼於股票或資產值嘅高低。股票可以愈跌愈貴，或者愈升愈平。如果股價跌九成，但原來盈利跌足100%，以估值嚟睇，股份反而貴咗，咁梗係唔抵買啦！搵到平價股後，就要搵股份重新評級嘅Trigger（誘因），分析吓股價反映咗幾多潛在正面或負面因素，因為股價永遠行先過Fundamentals（基本面）。

分散投資唔係多就好

Mary：坊間好多基金經理成日話分散投資，其實到底基金買幾多隻股票先啱？

陸：如果個股佔投資組合5%都無，咁不如唔好買啦，況且當大市差時，其實好股、壞股都會一齊跌，例如滙控（00005）跌，大新銀行（02356）、永亨（00302）多數都跟住跌。歐美市場就唔同，人哋板塊多、市場夠深。有啲行家買入近80隻股，多到連自己買咗啲咩都唔記得，咁我就覺得唔 係好對得住個客人囉！

Christy：下半年你有咩心水股？股民應要避開邊啲板塊？

內房折讓大 濠賭勢弱

陸：我目前管理嘅基金投資組合中，主要係能源股及息口敏感的舊經濟股，如內銀、內險及內房等。今年「三中全會」提倡潔淨能源，係長期國策，所以預期會利好板塊。我去年買入嘅光大國際（00257）及華電福新（00816）都已止賺沽出，目前仲持有內地「兩桶油」─中石油（00857）及中石化（00386）。華能國際（00902）都有買，因為股息率較高，近期煤價又持續下跌，而且我相信替代能源唔會咁快取代到傳統能源。

除咗能源股外，我喺第二季起亦增持內銀股，因為受惠微刺激政策，又預期內地將下調存款準備金率（RRR）。早前內銀獲准發行優先股以擴充資本，估計可加快迎合《巴三》（《巴賽爾協定三》）要求；加上雖然內地經濟增長放緩，但內銀壞帳未見急升，反映目前信貸風險仍可控。

另外，我估下半年內房股表現應該會好啲，因為折讓太大，市場過度悲觀，亦相信中央只希望樓價持平而非大跌。相反，本港地產及銀行板塊就要避開，因為政策唔「就」，亦預計資金成本會上升。濠賭股及奢侈品消費股我都唔會沾手，因為覺得內地反貪反腐係未來十年嘅事。

彩兒：阿里巴巴即將喺紐交所上市，會否令科網股再度炒起？

陸：要再睇吓先知，但科網股我無買，因為真係計唔到數，佢哋嘅盈利Justify（支持）唔到個股價，而且板塊群組又未夠大，相信下半年都難成氣候。

彩兒：去年你估計，未來兩年香港樓價會跌五成，依家睇法有無改變？

陸：樓市已經進入調整期，我睇未來幾年都係跌市。之前個版本只係我喺最壞情況下嘅預測。過咗幾個月都未見本港資金大幅流走，所以目前未去到最壞情況，估計下行周期會延長到三至四年，但降幅就維持40至50%啦！

恒指今年最高二萬四

彩兒：我知你一向鍾情港交所（00388），咁你點睇近日市場熱話「滬港通」？

陸：係呀，無論個人定公司旗下基金都大量持股，因為佢係獨市生意。我成日都話，澳門有多個賭牌，香港只得一個，就係港交所；啲人成日話佢30倍P/E（市盈率）好貴，但其實只係反映內地資本市場開放帶來嘅龐大契機。至於「滬港通」，唔係（中央）做出嚟醒你班中環股票佬囉。人民幣自由化已經成為大趨勢，喺佢可自由兌換前，內地需要先建立離岸人幣資金池、整頓銀行體系及於人幣離岸市場推出更多人幣計價產品，所以「滬港通」明顯只係實現人民幣自由兌換嘅一小部分。

Kitty：股民稱你為「股壇神算」，皆因你用「盈利收益率差模型」（Earnings Yield Gap Model）計出嚟嘅恒指合理值準過黃大仙！咁你今年推算係幾多？點睇下半年恒指走勢？

陸：我每年都有計，但今年個數真係太低，所以唔講喇。下半年恒指估計維持上落市格局，介乎21,000至24,000點，喺企業缺乏盈利增長動力、本港就業及資產市場轉差，以及零售市道疲弱下，未來六至十二個月港股都唔似會有牛市回歸。

彩兒 Kitty

若有料報畀彩兒同Kitty或有嘢問，可電郵money.biz@on.cc