Market Insight：本地銀行勝在高息

觀乎無方向唔止港股，華爾街恐慌指數（VIX）一樣跌到七年新低，VIX偏低，有種說法認為是投資者對經濟及股市前景過分安逸，可能引發投資者參與更多冒險行為。查實偏低的VIX，唔代表短期大市會出現轉角，很多客觀因素令VIX處低位。

宏觀角度，環球經濟同二○○○年之後，經歷科網股災、「九一一」、美國樓市崩瀉及雷曼爆煲的動盪時期比較，今日確實比較穩定。

古勝冇點你2014/06/30

萬里長空

微觀方面，環球央行經歷海嘯後，對金融業採取更嚴格監管及規管，市場對金融市場預期波幅降低。再者，亦都係更為重要的，是多國央行事先張揚的貨幣政策，美國聯儲局今年依循每次會議減少100億美元買債規模，慢速退市唔再理失業率低唔低於6.5%，主席耶倫強調結束買長債後，也不急於加息。

揸現金變得最蝕底

歐洲方面，為免再跌入通縮，歐洲央行行長德拉吉放水傾向更為進取，明言超低息周期，至少仲會維持兩年半，加埋日本量寬按劇本進行，全球主要央行齊齊鼓勵借貸，懲罰儲蓄者，環球資金成本史無前例地低，炮製出金融市場今年一個反常現象，首六個月，股債商品價格統統錄得可觀升幅，是二十一年以來首見。投資者最怕就係揸住鈔票，總之唔理三七廿一實行落咗注先算。

正在舉行的世界盃，先後腳被踢出局的三隻歐豬「西、意、葡」，十年期國債債息上星期在2.63厘、2.83厘及3.55厘水平，與美國十年期債息2.53厘比較，息差收窄到最多1厘。

幾年前歐債危機前後，相信無人可以估到有此斯光景。其他銀行或者高息企業債更加成為放棄揸鈔票者的避難所，渣打集團（02888）永續債券（無到期日，票面息6.409厘），一月底仲有4.6厘，上星期出半年業績預告前，落到3.1厘創史新低，大家似乎開始要習慣，多過4厘叫「筍」的市場新秩序。

中銀恒生相對吸引

環球經濟乍暖還寒，跨國大型銀行近年又積極去桿槓化底下，渣打、滙控（00005）等，收入（top line）唔跌就已經還得神落。渣打中期結算前報告，預告溢利要跌兩成，較市場預期遜色，上周五股價跌4.4%收報158.6元，樂觀假設全年盈利及派息跌一成，股息率大約3.8厘。

純粹追求股息的投資者，渣打吸引力看來不及中銀香港（02388）及恒生銀行（00011）等本地薑，兩行預期一四年股息率4.9厘及4.3厘。早前特區政府為樓市減辣後，近幾星期樓市有明顯回暖迹象，地產股經已先行一步，在展望資產價格穩定下，兩間股息頗吸引的本地銀行，似乎未完全反映優勢。

論板塊，上周五支付股同電池股雙雙發力，但圍繞呢兩個板塊未見有咩特別消息，相信都係悶市無甚作為之下，炒家隨意翻兜而已。

電池股中，飛毛腿（01399）及理士國際（00842）股價均創出52周新高，成交都幾像樣，唔排除短線仲有水位。想發掘同類落後股，上周超威動力（00951）發盈警，但見股價沽壓不大，上周五板塊氣氛做好，其股價觸及50日線便告反彈，收報4.37元，升2.58%，短線反彈阻力在4.6元。

超威有望成為贏家

睇番超威份盈警通告，公司預期今年上半年銷量及收入均明顯上升，但預計利潤則明顯減少，原因是內地鉛酸動力電池市場競爭激烈，以致產品售價持續受壓。近兩年鉛酸電池行業尚處整合期，產業政策支持汰弱留強，不合規格的生產商被叮走，大中型生產商則以價格戰搶攻市場份額。

超威在行頭手執牛耳，去年度盈利雖然倒退，但表現已較同類股如天能動力（00819）為佳。內地電動自行車市場銷售穩步增長，加上公司正積極與海外同業合作，拓展汽車啟停電池市場鋪墊產品技術和市場基礎，最終有望成為行業淘汰賽的贏家。

古勝