騰訊（臨時代號02988）（00700）月中拆細，由「啡底股」變「紅底股」，拆細後股價都算有交代。呢個時候，騰訊總裁劉熾平亦喺上個禮拜二，以111.558元嘅平均價，減持咗100萬股，套現超過1.11億元，係佢過去幾年套現最多嘅一次減持行動。
劉熾平今次喺季績後嘅減持，係剛剛遇上啱啱，定係心中有盤算，相信就只有佢自己先清楚。減持後，佢喺騰訊嘅好倉，由0.53%降至0.52%，加上佢過往亦不時減持公司股份，所以大家又未必要過分擔心，佢係咪因為睇淡公司股價而減持，事關以拆細後股價計算，佢過去喺28.6元至90.2元，都不時減持公司股份。
劉熾平幾時會再減持股份，外界真係無從得知，不過有條數可以同大家分享吓，劉熾平今年七月四日前，仲有一批行使價只需每股6.61元（拆細後計算）嘅認股權仍未行使，而由一五到二○年佢亦有另外一批行使價只需31.70元嘅認股權可以行使。所以就算騰訊股價未來幾年嘅升幅收窄，劉熾平持有嘅認股權，仲有大把水位可以行使。
余絲韻