Market Insight：地產股走勢靠得住

昨日焦點一定要講比亞迪（01211），上周五午市拉閘配股，以14.95%大折讓的每股35元配售1.219億股，集資額42.6億元，靜市下咁大規模批股，以為昨日復牌無運行，殊不知股價早市低見37.5元後，逐少收復失地，最後倒升0.15元收報41.3元，意味接貨者帳面即賺18%。

話就話接貨基金要T+5至收到新股，昨日未沽得，但1,225萬股沽空等於批股規模一成，可見收貨前唔少芬佬已經透過沽空鎖定既得利潤，居然仲可以倒升，昨衝入去的人士實力不容忽視。

客觀睇，一三年比亞迪淨負債比率由71%升至93%，今年首季業績差到極，收入及淨利潤分別跌9%及89%至117億及1,196萬元人仔。牌面如此，街外對配售仍求貨若渴，講到尾都係佢個故事動聽。今次集資主要用作提升充電池廠擴產需要，配合電動車發展。

古勝冇點你

萬里長空

比亞迪贏天時地利

上周國家主席習近平到上海訪問，話中國要有自主研發的民航客機外，主要係力撐中國再生能源汽車業發展，睇來睇去，中港股市內選擇十分有限，比亞迪作為先驅，揀啱時間批股天時地利贏晒。

昨日跌唔落，短期睇落應該有計，尤其今次批股size相當H股已發行股數15.3%，唔算多，加埋昨日32球成交，賓虛場面，估計過幾日新股出街壓力未必咁大。

當然，以基本因素考慮，要清楚就算集資後，明年電動車產能倍升，新能源汽車未有耐有實質貢獻，押注比亞迪憧憬一個長遠中國電動車夢，至少未來兩三年股價都要靠晒夢想支持溢價。

繼京東後，迅雷捲土重來到美國上市，惟今次股東結構大不同，小米及金山軟件（03888）分別持有7,100萬及3,190萬股，相當於27.2%及12.2%股本，意味藉兩間姊妹公司，雷軍間接控制近四成迅雷。公司一二年開始有錢賺，一二年淨利潤1,070萬美元，今年首季賺39.7萬美元，預計集資額1億美元，以金軟市值317億元或等於40.6億美元，揸得一成多迅雷，除非上市估值離譜咁高，否則要推郁金軟似乎唔易，昨急升證明衝咗至算的股民真係唔少。

零售股平貨選擇多

華潤創業（00291）出首季業績，營業額及盈利分跌15.7%及30.5%，至418.1億及3.56億元，三大範籌中，零售業務溢利倒退10.3%至4.7億元，虧轉盈的啤酒業務，收入78.7億元卻只有600萬元溢利！

算好定唔好，見仁見智；食品及飲品業務分別虧5,000萬及獲利1,000萬元。從數字可見，零售業收入佔華創業務的重要性日益提高。

去年十月與英國Tesco成立合資，整合中國零售務，會係未來兩年業績成敗關鍵，但睇番首季盈利只及大行全年預測19.27億元的一成八左右，難免要捱沽了。

今時今日，綜合企業唔易做，睇好啤酒的投資者未必想兼埋投資零售，反之，睇好零售又未必想啃埋ROE唔高之食品飲品生意，就算未來三季業績從後趕上，全年業績追到大行目標19.2億元，28.8倍PE雖然同五年歷史相若，但街外便宜零售股通街都係，又何必揀佢。

近期荃灣新盤開售反應熱烈，主要係用家經已觀望咗近半年，樓價都唔係點跌，息口又持續低企，加埋政府送上東風，DSD放寬買樓花限制，用家終於忍唔住手入市。既然有新盤銷情佳，相信唔少地主都會把握時機推售新盤，成個樓市生猛番啲。

長實挑戰52周高位

經驗顯示，此期間地產股表現亦唔衰得去邊。睇番恒生地產分類指數，昨日高位28,973點，唔驚唔覺經已上番250日線（28,792點）附近，收報28,741點，會唔會繼三月後又一次反彈受制於牛熊分界線，抑或今次能藉樓市氣氛轉旺而成功破位，不妨等着瞧。

地產股之中，以長實（00001）走勢表現最強，二月以來股價呈一浪高於一浪，短線回吐守穩130元關，後市仍有機會再反覆迭創52周新高。至於新地（00016），本月股價成功重上100元關及250日線，走勢亦有改善，但如果睇好正股表現，可以考慮公司認股證（01441），一換一，行使價98.6元，昨日收8.29元，溢價4.58%，實際槓桿6倍。

古勝