尋日個市其實好悶，臨收市突然冒出一單133,996%升幅嘅「X符號」烏龍盤，絲絲當堂嚇醒，呢隻小型股華電國際（01071）以每股5,860元成交62萬股，較上個成交價4.37元高出近1,340倍，交易金額達36.33億元，每股五千八百幾蚊，肯定係香港有史以來最貴股票，連股王騰訊（臨時編號02988）（00700）都行埋一邊。
港交所（00388）發言人同絲絲講，已接到有經紀報告下晝3點49分出現錯盤，但拒絕透露係邊間經紀行，又話有關錯盤已取消，由於係場外交叉盤，唔影響市價，收市後會調整華電總成交金額。咁證監又會唔會向有關經紀「打手板」呢？證監就對事件不作評論。
有八卦經紀同絲絲講，市傳單交易係一間中型華資行幫客戶射倉過指定戶口，點知就「闔埋眼對闔埋眼」，承咗至知揩大鑊，好彩交叉盤都係「自己人」，所以接納錯盤取消，經紀唔使上身。不過，唔知證監會唔會處分，好似新鴻基投資一一年嗰單國壽（02628）25億股烏龍盤，證監會喺一三年公開譴責同罰款。
華電近期消息唔多，昨調整後收市報4.38元，升0.2%，市值僅62億幾，即係一單烏龍盤夠買起間公司一半有凸。
交叉盤一般係由同一股票行代買賣雙方進行場外交易，交易所無即時紀錄，由於買方買入股票數目，與賣方沽出數目相同，所以雙方經紀可即時成交，而毋須透過自動對盤系統，而且只當一宗交易，可慳一半佣，亦因為咁，開價離晒譜亦唔受聯交所系統保護。
現時港交所嘅交易系統，正常時段內，經紀場內落盤最多只能開高或低24格，所以華電要嘜高千幾倍，系統肯定唔准輸入，而烏龍盤要錯價，亦最多只係9倍內，只可以喺開市同收市競價時段落高於市價8倍嘅叫價。
余絲韻