絲絲講場：法興魔童難逃鐵窗
法興「魔童」克維爾○八年因違規交易勁輸49億歐元，差啲令銀行沒頂，一直強調自己無辜嘅佢，經過幾年訴訟仍無法改變厄運，終於喺周日深夜限期前投案，佢將會被送到監獄服刑三年，為呢宗轟動一時嘅案件暫時畫上句號。
徒步返國揭金融霸權
克維爾喺今年三月法國最高法院維持佢嘅欺詐裁決前，出走梵蒂岡，外界一度以為佢計劃潛逃，點知佢係同教宗方濟各見面。之後聲稱受到啟發，展開徒步由羅馬前往巴黎之旅，宣揚金融業霸權嘅訊息，但點知佢只行到法國同意大利嘅邊境小鎮芒通時就被捕，無法完成整個朝聖旅程。
一身行山裝打扮嘅克維爾，喺被拘前依然向身旁採訪嘅記者批評司法制度唔公義。事實上，克維爾獲唔少法國人支持，77%受訪者認為他只是代罪羔羊，更有三百人包括其粉絲等待佢被捕一刻。
民事索償案恐手尾長
唔少人都覺得克維爾依家先三十七歲，出獄後仲係一條好漢，雖然佢肯定唔能夠重返金融業，但就不妨學電影《華爾街狼人》嘅真實主角喬丹‧貝爾福特出版自傳同售賣電影版權賺番一筆。
不過，絲絲就擔心法興對佢民事索償嘅案件仲未結束，即係話仲有手尾要跟，即使最終只係賠番個零頭，都唔得掂！
余絲韻