近年台劇及韓劇當道，連帶人氣台、韓明星嘅代言產品亦大受追捧，不少內需股已重金禮聘台、韓明星造勢，依家更有意聯手台、韓品牌開拓中國消費市場。
達芙妮（00210）喺今年三月底已出手邀請南韓女星、飾演近期熱爆韓劇「來自星星的你」嘅女主角千仲伊嘅全智賢為旗下品牌造勢，代言由本港明星謝霆鋒設計嘅鞋款。361度（01361）亦唔執輸，上個月廿二日宣布同台灣歌手蕭敬騰簽約，成為集團時尚副品牌「尚」代言人。
五‧一假期前夕，金鷹（03308）趁江蘇南京新街口旗艦店全生活中心亮相之際，更帶嚟二十六個首次進入中國或南京市場的國際品牌進駐，齊齊喺內地掘金。
金鷹呢間全生活中心仲同多個品牌成立合資公司，包括台灣流行時尚品牌iRoo，同埋南韓品牌Mr. Pizza。據悉，Mr. Pizza舊年曾經搵南韓人氣綜藝節目「Running Man」成員之一嘅宋智孝擔任代言人。睇嚟呢股席捲內地嘅韓流，有機會成為內需股銷售反彈嘅必殺技。
余絲韻