近期喺網上成日見到男生們話：「此生只想找一個肯陪佢捱M記嘅女人」，唔通西方國家早已流傳呢個講法？
事緣係德銀兩年前已經推出咗「廉價約會指數（Cheap Date Index）」比較各地約會使費，今年結果係倫敦最貴，最平係印度。
對男生嚟講，約出嚟去街嘅女仔其實未必位位都做得成正印女友，壓低約會成本至「食M記、睇齣戲」嘅想法絕對可以理解！
德銀呢個「廉價約會指數」可以話係《經濟學人》「巨無霸指數（Big Mac Index）」嘅變種版本，係以約會嗰陣搭的士錢、M記漢堡包連汽水、兩張戲飛同埋兩杯啤酒嘅價錢，為全球32個城市物價進行比較。
貴絕全球嘅係倫敦，「廉價約會」盛惠121美元，即直逼成千蚊港元，英國物價向來高漲，榮膺最貴絕不意外；但排行榜尾嘅係長年高通脹嘅印度，約女仔出街使費只係23美元，即港紙200蚊有找，德銀解釋印度高通脹效應畀當地貨幣盧比貶值抵銷咗。
指數為物價向來貴爆嘅東京平反，「廉價約會」使費100美元，平過倫敦、威靈頓、愛丁堡、悉尼、柏林同巴黎。如果以紐約（使費93美元）為中值，喺香港、北京同上海約女仔出街都相對較平，只花上相當於紐約五六成嘅價錢就搞掂。
余絲韻