美國《華爾街日報》網絡版日前刊登咗一篇題為《Apple CEO Tim Cook Steps Out of Steve Job's Shadow With Beats Deal》嘅文章，爆料話蘋果公司嘅現任CEO庫克最近頻頻邀請各界猛人加盟，其實係為咗藉佢哋嘅名氣，走出教主喬布斯嘅陰影喎。
上個禮拜五，市傳蘋果公司擬收購高檔耳機品牌Beats Electronic（俗稱B仔），外界就揣測庫克打算開多條產品生產線，以及為iTunes迎戰對手Spotify，但《華爾街日報》認為庫克係睇中咗Beats兩位創辦人嘅名氣，其中一位艾歐文（Jimmy Iovine）就係音樂界嘅頂級人物，除咗係某大唱片公司老闆，幫過Bruce Springsteen同埋樂隊U2製作過唱片專輯外，佢仲經常亮相美國當紅選秀節目《American Idol》，客串做過評審。
至於另一位創辦人Dr. Dre（原名Andre Young）就更加唔駛點介紹，佢咪係美國Hip-Hop教父囉！未來兩人加盟做創意顧問，實行借佢哋嘅名氣嚟推廣Apple。
至於蘋果公司用到32億美元嚟收購Beats，好多人都質疑呢個收購價太高，其實背後仲有另一個故事。原來艾歐文同已故教主喬布斯相當老友，不時喺教主家中留宿，而喺○四年，艾歐文早就同教主討論音樂服務，期間喺音樂範疇上出過不少力，可謂最早見證iTunes呢個音樂平台面世嘅人之一。
依家蘋果公司出到天價同艾歐文買Beats，直頭係一個報恩故事啦。
如果心水清的話，應該記得庫克去年十月曾跨行業咁搵咗英國知名時裝品牌Burberry嘅前CEO阿倫特斯，負責零售業務，呢個月阿倫特斯開始返工添。但有消息估計庫克呢個招星加盟Apple大計仲未完，佢仲會陸續邀請多啲知名人士加盟，實行眾星齊齊Sell Apple。
余絲韻