Market Insight：高息股有買趁手

個市陰陰乾之後突然挾到癲，挾淡倉是其一，而古勝唔只一次講過，近日港匯強到出奇，昨日即市見7.7514，平咗年初以來高位，同金管局強方兌換保證只差14點子。市場熱錢不缺，基金經理只係等一個入市理由，莫非連強勢的濠賭股都出現終極一跌，個市真係見底？

昨日升市功臣騰訊，貢獻86點升幅，一來公司四月先喺五舊水附近回購股份，開始惹來繼續回購的憧憬，但最主要原因仲係京東昨日開始推介活動。

古勝冇點你2014/05/13

萬里長空

京東上市估值，最高可以去到248億美元，大約1,934億港元（四分之一間騰訊size），淘寶幫襯得多，唔好問在下京東點解咁值錢？客觀條件係，去年京東活躍會員4,740萬戶，六成四收入來自網上電器及家居產品交易，總收入115億美元，虧損由一二年的5,000萬美元減少至800萬美元。

科網估值確實科幻

話說今年三月，騰訊用2.15億美元入股京東15%，意味當日京東整體估值不過14.3億美元，短短三個月唔夠，因為追捧科網概念的股民夠熱情，價值膨脹多十幾倍，騰訊手上京東帳面上有過百億人仔的紙上富貴。

當然，炒家用呢個理由衝入去做清兵，古勝唔會反對，但要清楚騰訊唔會短炒京東，已經承諾上市時會以招股價（即每股16至18美元）額外買多5%股份，成本估計12.4億美元，足足係首輪入股成本六倍多。科網股估值，實情有啲似睇科幻片。

講番近期個市勁傳特區政府計劃放寬「雙倍印花稅」換樓期限，傳聞會由六個月改為一年。由近年特區高官新政前放風試水溫的手法，似乎修正DSD事在必行。個人觀感係辣招後樓市死寂，街外鎖匙盤又少，始終BSD同SSD才是窒礙換樓及投資客的致命傷。

地產股早落後樓價

地產商會唔會因此改善去貨情況？在下唔樂觀，但一句到尾，○九年開始地產股已經跟唔上樓價，落後得太緊要，任何風吹草動都有炒作可能，即使新例未必真係幫到佢哋，可繼續睇實隻大落後的新世界發展（00017）。

近排美息落番唔少，一班好息的老友成日問有咩可以買。查實亞洲高息債券市場，過半來自祖國企業，當中有六成是內房股，大行估今年五至九月係內地私企債兌付高峰期，呢類為粒糖隨時輸間廠的高危活動，仲係可免則免。本來十大內房真係唔怕會執笠，只係怕到時私債市場沙塵滾滾會殺錯良民。

數落去買本地兩電，是絕佳收息之選，可惜今時今日市民對公用事業加價敏感度史無前例咁高，政治壓力太大。REITs？如果個人遊消費見頂，甲級寫字樓以外，有做遊客生意的商場店舖未來租值壓力都幾大，數落去都係搵專攻屋村及私人屋苑的比較穩陣，貪佢影響最細。

一對鐵膽必然係領匯（00823）及置富產託（00778），一四年估計有4.19厘及6.28厘回報，仲有隻冷門小小，並非純正的REITs，但經營模式有啲似，是主攻將廠廈變成數據中心散租出去的新意網（08008），估計有4.5厘，且未來幾年租金及可供出租空間都有唔錯升幅，可以一併加入考慮。

政策刺激效果短暫

受「新國九條」消息刺激，中資券商股昨日成升市領頭羊，中信証券（06030）、海通證券（06837）及中國銀河證券（06881）升幅介乎3至4%，第一上海（00227）及申銀萬國（00218）分別升7%及4%，國泰君安（01788）升3%。不過，似乎類似的利好政策，刺激作用真係一次比一次小，皆因內地經濟數據欠佳，投資者持貨信心亦打了折扣。

更何況是，類似的長期政策難以抵銷短期不明朗因素，包括盛傳內地A股IPO有機會在月底再次重啟，屆時A股市場的承接力又再次備受考驗。是故，因應相關消息炒作宜注意風險，畢竟依家並非大牛市，缺乏宏觀數據配合的政策消息，刺激作用難持久，短炒要適可而止。

古勝