港交所（00388）行政總裁李小加前日發表網誌，話「同股同權」喺香港並非普世真理，更引用港交所本身做例子，話政府無論係咪持有港交所股權，都有權任命半數董事局成員，並可任命董事會主席，而政府之能夠獲豁免「同股同權」原則，是要維護公眾利益。
據絲絲聽聞，李小加呢個立論引起政府方面「有啲意見」，因為政府喺港交所董事局成員委任上與其持有股權無關，與「同股同權」更是兩碼子嘅事，小加嘅立論似乎有點偏頗。
唔知係咪咁，小加喺發表網誌24小時後即刻「補鑊」，澄清話佢引用港交所並非最理想例子。佢話引用港交所例子，原意係想講「同股同權」可能會讓位畀一些更重要嘅原則。強調政府有權任命港交所12名非執行董事中嘅6名，政府呢一個權力係由法律賦予。
小加仲話，佢寫呢篇Blog主要係想拋磚引玉，啟發大家討論一啲最困難但最重要問題，為香港搵到最佳答案。
不過，理想同現實通常都係兩回事，佢嘅Blog頗為惹火，好似之前篇「夢境」，化成多個角色闡述對合夥人制嘅睇法，就被市場人士認為幫阿里幫到出晒面！
余絲韻