絲絲講場：滙豐化廢料變藝術
環保唔單止對地球好，仲好時尚，滙豐就深明呢個道理，同薩凡納藝術設計（香港）學院合作，推出「Waste to Art」綠色藝術展覽。
一班薩凡納香港嘅學生創意十足，利用滙豐日常營運中產生嘅廢料，其中包括塑膠、紙張、電器同電子廢料，創造出23件藝術雕塑，帶出關注環保嘅訊息。呢啲別致嘅雕塑會喺滙豐位於中環、奧運同將軍澳辦公大樓展出。
馮婉眉落力搞環保
展覽開幕禮嘉賓分量十足，包括環境局副局長陸恭蕙同滙豐香港區總裁馮婉眉（Anita），Anita大讚學生嘅創意同熱誠，仲話雕塑可以提高員工嘅環保意識！
滙豐為咗支持環保推出「環保足跡計劃」，第一季度活動嘅主題係水資源，今次係廢物，未來兩季仲會有能源同紙張，心思十足。
余絲韻