絲絲講場:創投女星探 慧眼結良緣

娛樂界有星探,創投界都有星探,講緊嘅就係一班幫創投基金物色初創公司嘅投資者。近年愈黎愈多年輕人加入呢個星探行業,廿幾歲就管理過百萬資金。同絲絲差唔多名嘅CeCe Cheng係其中一個,佢唔只做星探,仲做埋創投界嘅「明星」。

CeCe讀大學嘅時候創辦The Dorm Room Fund(大學生寢室基金),喺大學裏面物色咗好多具發展潛力嘅初創公司,幫公司First Round Capital賺唔少,話佢獨具慧眼,真係完全無誇大。

同Dropbox老闆拍拖

紐約創投界嘅女性已經少,華裔美女就更加「稀有」,CeCe可以話相當受矚目。依家佢同Dropbox嘅創辦人休斯敦拍拖,有可能同呢位身家6億美金嘅科網富豪拉埋天窗!

華裔美女多才多藝

絲絲睇番原來連facebook嘅創辦人朱克伯格都娶咗個華人太太Priscilla Chan,唔通華人女性喺外國富豪界咁有吸引力?絲絲仲知道佢多才多藝,唔只識玩投資,喺大學其實主修政治及國際關係,玩投資之前做過PR,仲精通廣東話、英文、西班牙文同法文,真係又靚又叻,唔怪得吸引到億萬富豪喇。

余絲韻