最近有報道指天巒晚上夜闌人靜無人住，比喻為鬼城，呢種聳人聽聞嘅講法似嚇人多過實情。絲絲明查暗訪後，知道天巒平日入住率達76%，如果計埋假日度假嘅5%住戶，即係天巒入住率達到八成以上。晚上燈火通明，如果咁都話係鬼城，好似對業主有啲唔公平喎！
講真住得洋房嘅住客都係鍾意環境寧靜啫。其實天巒空間大，又有大花園，靜靜哋自由自在咁樣至係洋房嘅賣點。好似視帝黎耀祥都係天巒嘅住客，佢哋都不知住得幾開心！好似一三年嘅住客戶調查就顯示客戶滿意程度達到98分（100分為滿分），當中佢哋最鍾意嘅係會所，園林綠化同埋管家服務。
講到管家服務，除咗會幫住戶解決日常家居問題，仲可以託管屋企鎖匙、訂枱食飯、代訂中港七人車等等，咁貼心，難怪受住戶歡迎啦！
絲絲仲知道，天巒會所不時搞活動，住戶參與率相當高，好似去年底嘅聖誕節及萬聖節Party，更加有過百名住戶參與，講真絲絲所住嘅大型屋苑會所搞嘅活動最多都係幾十人咋。
有人會問天巒位處上水雙魚河附近，住戶唔怕遠咩？絲絲八到大部分住戶都係老闆級，唔使九點同人逼返工，加上駕車轉彎一出就到高速公路，唔使半粒鐘就返到ICC，即使出中環IFC返工都係只需35分鐘。
咁正嘅洋房放盤情況又如何呢？據地產代理透露，目前天巒二手放盤約70至80宗，但據講呢啲放盤純粹係業主測試吓現時市價，慢慢等個好價先至會賣。
余絲韻