絲絲講場：新證飯堂易手要換畫
絲絲最鍾意喺中環捐窿捐罅尋找隱世美食，其中就有間好出名嘅餐廳「新證美食」，呢間外表唔多起眼嘅餐廳，係新鴻基證券嘅「同學會」搞嘅，好食但又唔貴，仲好有歷史價值，但嚟緊會有少少轉變，就連掛咗喺餐廳好耐、新證創辦人之一嘅馮景禧畫像，都要另外搵地方存放。
呢間「新證美食」係好多證券界從業員鐵竇，坐落中環一幢唔起眼嘅舊商廈入面，係恒地（00012）主席四叔嘅物業，係華資證券業行內嘅聚腳地。
馮景禧畫像快搬走
尋日絲絲同證券業老行尊張天生，又去鐵竇邊食邊講故仔，張天生話，「新證美食」將改名「新聚會」，由幾個餐廳老伙記接手經營，由於唔再以新證舊生會名義經營，馮景禧嘅畫像就唔多適合繼續掛，所以依家籌劃緊搬去邊。絲絲見餐廳入面仲有好多珍貴相片，幾乎由七十年代開始嘅財經名人，都喺相片中出現。
當年開張 四叔獻唱
張天生記得新鴻基證券「同學會」九七年成立當日，喺馬會舉行成立儀式，四叔仲罕有獻唱，佢話四叔都有嚟過餐廳食飯，仲帶埋二仔李家誠同埋新抱徐子淇。
據張生講，餐廳雖然改名，但一切照舊，包括裝修同整好嘢食嘅宗旨，有乜招牌菜？咖喱牛腩油炸鬼、紅燒乳鴿同紅豆沙等，都係絲絲至愛。
余絲韻