期指觀瀾：重新開倉再等一會
乍看指數，昨日大市154點波幅，114點跌幅，無乜睇頭，可是指數反映唔到二三四線小股災。到底有幾悲壯？跌幅8.5%以上昨日都入唔到五十大跌幅榜。姑勿論點，純睇恒指，落後藍籌主導大市僅一日，昨日又輪到騰訊（00700）領導跌市，股價急挫4.8%，相當指數99點。
恒指即市高位21,858點，明顯受制於前日21,866點即市阻力，期指去到21,843點見頂，同樣無法突破周一21,868點阻力，加埋成交連跌兩日，主板成交由上周五917億元，縮到周一的745億元，再跌至昨日666億元，21,137點至今的反彈，畀人感覺並唔穩陣。
三月期指在周五結算，連日來見大戶轉倉未算積極，由即市兩月合約差也看不到大戶對後市有明顯取向，日內如恒指或期貨可分別破到21,866點及21,868點，或者可試0.5及0.618阻力，但先機已失，要反手做，不如睇一兩日再決定。
沒有騰訊因素影響，國指表現相對恒指好，跌4點報9,690點，惟即市高位9,779點，啱啱受制於50日線，中短線，去年十二月國指由11,500點樓上進入調整期，十二月底反彈就係止於50日線，之後跌勢加速，50日線9,786點會是短線重要關。
John Mullen