Market Insight：基金派貨避險至上

昨日下跌股份唔單止多，跌幅仲唔嘢少，排到跌幅榜第五十位的中國置業（00736）都要跌8.5%，上面49隻當中，唔少係近期當炒的新能源股，以及手遊、奶粉、電訊設備及充電池等早前當炒板塊。

周一大市勁升400點，主要係中移（00941）及內銀等低beta落後股帶動。到昨日，一眾對沖基金重倉的outperformer出現要錢唔要貨的場面，睇落兩個微妙轉變一先一後出現，不是偶然。睇手影，似基金大手轉換投資組合所為，但傳統上，咁大動作一般甚少揀基金季結（下周一）前夕進行。

古勝冇點你2014/03/26

萬里長空

大小戶或齊齊中招

事實上，古勝所見，唔少本地中型對沖基金，首季跑贏benchmark都靠晒呢幾個板塊股票食胡，揀此時此刻來個乾坤大挪移，如果情況再持續多幾日，恐怕唔單止散戶，相信唔少走避不及的大孖沙都要陪葬。

繼續講業績股，瑞聲科技（02018）去年全年賺25.77億元人仔，貼近預測上限，撇除出售聯營公司的經常性溢利22.9億元人仔，期內毛利率42.7%，較前三季的42.6%有輕微改善。現價32.9元，市值404億元，相當於純利12.3倍或者經常性溢利13.9倍。

瑞聲年初股價突破40元後，近期拾級向下。展望今年第三季，蘋果公司九成九會推出配備更大屏幕、及傳聞兼具NFC支付系統的iPhone 6，縱觀擁有聲樂及NFC綜合部件技術，又能夠應付大批次訂單的公司唔多，睇故事發展，未來一季應該可以密切留意。

恒安唔容易執平貨

此外，奶粉股雅士利（01230）去年賺4.38億元人仔，按年跌6.5%，接近4.35億至5.8億元人仔的大行預測下限，股價昨跌10.3%收報3.66元。

被蒙牛乳業（02319）收購後，市場都聚焦兩者的策略性合作，可惜分析員會議上管理層似乎將重心放在進軍一線城市，以及調整產品結構，傾斜高端嬰兒奶粉的部署，對進口奶粉減價促使競爭加劇，有點避重就輕之嫌。以高位5.54元計，股價調整咗三分之一，回到23.1倍PE唔算過分，反而值得留意係，股價已跌近去年十一月淡馬錫及厚樸幫蒙牛維持流通量所接貨的成本價3.5元，短期或者有迴轉之力。

另一隻沾到「單獨二胎」概念的恒安國際（01044），業績無大驚喜，去年盈利37.21億元僅升5.8%，較平均預測38.7億元少3.8%。去年下半年紙漿價格微升，使全年毛利率45.1%，稍低於上半年的45.2%，是業績低於分析員估計的元兇。

往績PE 26.8倍唔平，昨日股價跌幅溫和，在下認為歸功於基金經理對管理層高效及透明管治已建立信心，習慣貴買貴賣之外，街外估今年紙漿價會見頂，有助毛利回升，業績估計升21至23%，稍高於1倍的PEG，對恒安而言未算好貴，但鍾情執平貨的，恒安未必係閣下杯茶。

家陣短炒嚴守紀律

講番昨日二三線股就好似股災咁款，跌幅一成乃等閒，真係走遲半步都幾閉翳！好似隻夜店股Magnum（02080），股價急挫19.7%；華彩控股（01371）跌13%，中國風電（00182）跌12%；漢能太陽能（00566）業績唔差，亦要跌8%；去年虧損收窄的李寧（02331）亦挫11%。

顯見，昨日二三線股跌勢，無論績優績差、有冇消息都照沽。不排除大戶在季結前一邊在托住指數結算，另一邊就沽貨套現。咁做完結算市況會係點？缸邊友要提高風險意識，自求多福。

古勝認為，短炒最重要就係嚴守紀律，到咗止賺止蝕位就要嚴格執行，之後再因應實際發展如何再重申考慮係另外一回事，總之千祈唔好唔識輸、心存僥倖做鴕鳥，免得投機唔成變成投資！

古勝