首席財務官（CFO）被形容為上市公司嘅靈魂人物，重要性甚至超過大股東同CEO，原因係CFO最清楚公司盤數，所以歷來好多CFO離任都會引嚟唔少揣測。碧桂園（02007）尋日中午12點半突然公布，伍綺琴因私人理由提出辭任CFO，四月底生效，碧桂園下晝即時插水式急挫，收市跌咗一成二，創咗一年新低。
芬佬朋友同絲絲講三個值得關注嘅重點：第一係伍綺琴並非公司董事，辭任毋須出通告，但今次就發出「自願性公布」；第二係伍綺琴出身聯交所上市科前高級總監，喺行內有一定嘅身份地位；第三係近排內房股受到央行收水、人仔貶值等因素打擊，寧波仲有大型內房企業債務違約，成個板塊都無運行，呢個時候唔做CFO，真係嚇到唔少芬佬掟都掟唔切。
碧桂園話，公司已開展招募及內部甄選程序，盡快落實首席財務官一職，並會喺短期內就委任新首席財務官事宜發出公告。
有消息人士就同絲絲講，過去兩年已經有獵頭公司傳幫碧桂園搵緊CFO，所以已經傳過伍綺琴離任。佢又話，根據碧桂園一二年年報，主席楊國強、副主席楊惠研、CEO莫斌，年薪分別約353萬、175萬、255萬元，但最高薪兩名高級職員年薪共855萬元，當中一人相信就係伍綺琴，依家內房股正值寒冬，又確係要開源節流嘅。
余絲韻