絲絲講場:證監打虎搵猛人坐鎮

近排證監會頻頻發功打老虎,迫犯規者「回水」一招更加令市場聞風喪膽。證監會最近又有新動作,喺外國請咗個猛人來港坐鎮,領導新成立嘅企業規管專責小組,專門(目及)實啲「曳曳」上市公司。

Duignan監管履歷勁

呢位猛人係Michael Duignan,今年二月至加入證監會出任高級總監,負責企業規管專責小組及雙重存檔小組。Duignan來頭不少,曾經喺Malta金融服務局、Irish證券交易所、英國FSA等做過,喺歐洲嘅證券監管及市場監察經驗豐富。今次做「過江龍」,頭炮就係主動偵察上市公司嘅不當行為,上市公司真係要打醒十二分精神!

證監會早前高調宣布成立呢個企業規管專責小組,講到明會(目及)住公司通告,仲會深入檢視啲公司,尤其係嗰啲曾錄得虧損或經常重組嘅公司。

至於證監會行政總裁歐達禮,眨吓眼就快到三年任期,到今年九月底就約滿,證監會主席唐家成開到口話,同歐達禮合作愉快,如果佢續約會好高興。況且有歐達禮身邊人講,佢愈做愈投入,睇嚟續約都幾乎已係呼之欲出!

余絲韻