Market Insight：新秀麗有重估空間

近期騰訊（00700）股價日日3至4%上落，睇住佢幾乎可以估到大市點行。昨日一隻騰訊就郁咗個市36點，唔係佢，個市唔使跌。萬眾矚目係收市後份成績表，全年賺155.02億元人仔，按年升22%，營業額604.3億元人仔則升38%。

業績稍低過市場預期的156億元人仔，主要是去年第四季來自聯營公司虧損，以及合營項目毛利率低過預期所致。

古勝冇點你2014/03/20

萬里長空

家陣估計基金及散戶的焦點，會分別落在公司執董、首席技術官及創始人之一張志東，以私人理由請辭（據報轉到騰訊學院任教，培訓人才），以及計劃將股份以一拆五比例拆細，每手維持100股。一句到尾，拆細令手上股份多咗，但每股盈利照除，其實股東無真正得益，接近53倍往績PE遠遠遠高於每股盈利增長率22%，現價很大部分正建基於投資者對中國網絡行業發展的空中樓閣。

哈行上市無賣點

睇番舊年年尾上市的重慶銀行（01963）以及光大銀行（06818），雙雙停留在深海作業當中。「豬肉」在前，啱啱開始招股的哈爾濱銀行（06138），早前放晒風話以0.6至0.7市帳率招股，直到拍板IPO前峰迴路轉，傳聞富邦人壽及中信資本等基礙股東撐場，保薦行圍夠飛，決定進取番多少，傳聞傾向以0.9倍市帳率左右上市，無咁賤賣國家資產！

不過，見近排個個星期都有內地私企優先違約，人行拒救寧波出事房企呢類新聞爆出嚟，大孖沙信心喺邊度嚟？睇嚟除咗畀阿爺揼心口就諗唔到其他原因，真係傳聞去到一四年0.9倍上市的話，博都慳番。

資金充裕利發展

早排韓劇《來自星星的你》大熱，連劇中一眾植入式商品都被熱捧，食南韓炸雞變咗潮之象徵，主角都教授金秀賢腳頭真好。金秀賢代言新秀麗（01910）背包被粉絲秒殺之外，股價在20至24元之間悶了半年的新秀麗，有發力迹象，昨日十三球成交升9.4%，收報22.65元。

開市前已曝光的業績，全年賺1.76億美元按年升18.6%，符合市場預期，每股盈利12.5美仙，末期息5.7美仙。管理層預期，今年中國及印度增長較快，足以抵銷北美銷售由一三年的24.6%高增長中放緩之外，賓架最關注仲係公司去年現金流強勁下，手頭現金增至2.25億美元，減去負債1,550萬美元左右，淨持現金2.098億美元。

大摩早排就同佢計過數，連埋未來三年預期自由現金流達每年2.5億美元，公司足以進行規模達10億美元的收購，協同效應及提高營運槓桿下，有助未來估值重估。

新秀麗一四年預期市盈率18.4倍，以今明兩年估計增長19.3及13.5%，股價合理，落實收購會是中短期內刺激股價的催化劑，20至24元之間可以考慮分段收集，相信距收成日子唔遠。

雖然騰訊公布業績前股價反覆偏軟，但無阻軟件股展開反彈浪。金山軟件（03888）股價由上周五低位25.95元，反彈至昨日創52周新高30.85元；金蝶國際（00268）股價亦由本周一低位2.67元，反彈至昨日創52周新高3.69元；中國擎天軟件（01297）由上周五低位3元，反彈至昨日高位見3.89元。

散戶跟炒免過夜

反彈浪成交大增，到底係之前市場低估了板塊估值，致使績後引發重估潮；抑或市況沉悶，班大戶冇嘢好炒，就揀業績消息唔差的軟件股短炒一轉，古勝亦弄不清！

反正呢類股波動甚大，跟炒最好都係盡量即日鮮操作，免持倉過夜，最多瞓醒又再玩過，始終後市利淡因素仍多，此刻冇參與炒作異動股唔覺咩大損失，反而最怕係在高位誤接火棒，又要被迫展開長期「望鄉」歲月。

古勝