絲絲講場：蓋茨得把口錯失WhatsApp
微軟創辦人蓋茨喺接受美國《滾石》雜誌採訪時自爆，原來佢都有諗過收購WhatsApp，訪問之中佢仲大讚Facebook（fb）創辦人朱克伯格嘅侵略性收購係明智添。
讚朱克伯格有膽識
WhatsApp最近啱啱畀fb用190億美元天價收購咗，蓋茨話佢當初其實都有諗買起WhatsApp，仲留意咗一排，雖然唔知自己會出價幾多，但可以肯定嘅係ＷhatsApp嘅用戶群的確係寶貴，而且蓋茨都幾欣賞朱克伯格嘅膽識，喺訪問入面仲讚咗朱克伯格幾句。
除咗講起WhatsApp收購之外，蓋茨仲分享咗件微軟同蘋果公司合作嘅往事。原來，佢哋當初做Mac軟件嘅緊密合作夥伴，蓋茨話當年微軟因為自己擁有多啲人力資源而覺得好自豪，點知自己原來太幼稚。一開始喬布斯承諾呢個會係一個價值499美元嘅產品，點知最後發現個售價高達1,999美元。最後，Mac項目唔單止用咗好多資源，連原來參加嘅團隊都做到筋疲力盡，兩年內走晒。雖然係咁，但蓋茨依然覺得呢段合作係一個神話，仲用天才去形容喬布斯添呀。
蓋茨、朱克伯格、喬布斯，呢三個人分別代表三種唔同嘅產品領域，但蓋茨認為，三者中最主要嘅分別係朱克伯格由產品開始、喬布斯就從美學開始，至於佢自己就係喺架構上開始。
喺個訪問度，蓋茨仲評論咗美國中央情報局前僱員斯諾登洩密件事，佢就唔係幾認同斯諾登嘅做法，仲話應該會有其他比較好嘅方法去帶出同一個目的。
余絲韻