跨國公司職員不時周圍飛，遇着要去泰國、烏克蘭呢啲政局不穩嘅地方，都咪話唔心驚！
國際SOS就睇準出差人士嘅安全同醫療需求，請咗200幾個安全專家同1,200個醫生，等企業客戶嘅各位高層可以安心出差。
呢班安全專家大有來頭，唔少之前做過英、美、澳洲嘅國家情報人員，國際SOS香港區總經理鄭韓菊芳表示，安全專家對佢哋負責嘅地區有良好認識，專門去因為天災、政治相對危險嘅地區實地考察，確保向客戶提供準確情報，等佢哋可以妥善安排員工嘅公幹行程。
鄭經理同絲絲分享，有次有個客人去蒙古工幹嘅時候出現內出血，國際SOS要即時派架醫療專機、一隊醫護人員再加大量血包去接佢番原駐地，最終呢位客人平安無事，仲請國際SOS員工食飯，以表謝意。
國際SOS主要客戶係各國政府，連內地外交部同美國國防部都用過佢哋嘅服務，世界財富前一百大當中88%嘅企業都係國際SOS嘅客戶。
客戶一來可以保障員工安全，二來真係可以盡力預防意外，萬一員工出差時受傷，公司客戶要負嘅責任亦有望減少。
余絲韻