馬雲同馬化騰呢兩個名成日都會喺國際或者本港嘅媒體度見到，基本上同啲娛樂人物一樣，但好多時啲八卦都係未經證實，搞到馬雲都忍唔住要越洋暗嘲一吓呢啲所謂八卦消息。
最近去咗法國同意大利公幹嘅馬雲喺個人「來往」札堆上講到，自己因為時差瞓唔着，就索性上網睇吓關於自己嘅八卦新聞。
例如之前有人話佢哋注資入中信21世紀（00241）同埋文化中國傳播（01060），想喺香港展示財技借殼上市，搞到追捧馬雲概念嘅股民，炒到呢兩隻股連升幾倍（係近兩日先慘跌）。馬雲就好搞笑咁用咗個偷笑Emoji，再加句「上市真有那麼難嗎？」去回應傳聞，仲間接否認埋件事。其實絲絲都知，以馬雲旗下嘅阿里巴巴，收入係全球科網嘅前列，要上市又有咩難度，使乜用到借殼呢一招？
唔單止提到借殼，馬雲又講到網上流傳話佢二月份同陸兆禧吵咗一鑊，所以三月份馬雲就將原本由陸兆禧掌管嘅無線業務許可權交俾張勇。馬雲就用咗個蠱惑Emoji去回應「要是知道我們天天會吵架咋辦呢？」！
見到馬雲咁風趣嘅回應，絲絲覺得佢都幾識得笑看風雲，難怪佢話依家做得網絡企業要有娛樂精神啦。最後馬雲還勸告造謠者認真生活，快樂工作吧！
余絲韻