「最近我睇到一篇，由前輩曹仁超所寫的文章，內容大意係人之所以貧窮，主要問題係因為理財不善，作為一個比你哋大二十幾年的師兄，睇番周遭同學的際遇，我應該夠資格同大家講，呢個論點真係好啱。
你可以話黃國英係一個極端的例子，職業就係投資，赤手空拳白手興家，喺個市場賺咗數以億計利潤，但係我有個同學，憑住投資蘋果公司、Google、金沙等等股份，已經可以印印腳等退休，返工只不過係興趣；亦有個同學，二十幾年工作之後身無長物，居然諗住第日要靠份MPF，大家起跑線一樣，都係一九九○年港大社科學士，最大的分別，肯定係理財的態度。
問題係好多人投資咗好多年，最終都係一樣得個吉。即係話，知道要投資並唔足夠，關鍵係要有正確的投資態度，或者仲要有一份不屈不撓的精神，係我個年代，投資學會並唔存在，而我自己喺投資路上，其實係走咗好多冤枉路，我夠傻，先至一路堅持，係個過程當中，要放棄真係話都無咁易。
同五年前相比，依家大學生投資風氣大幅倒退，係呢個環境之中，大家今日上莊，希望你哋會有一份使命感，去推廣正確的投資理念，你哋的工作其實係相當重要，若干年後，固然應該會有一份寶貴回憶，同志趣相投的朋友喺年輕時一齊打拼過，但更大的滿足感，可能會係你有一日發現，有人因為你哋的工作而得到改變，佢哋有咗份正確投資觀念，令生活環境大大不同，希望你哋朝住呢個方向努力。」
最近幾日，自己炒到戰意低迷，因利乘便，就用剛剛在港大投資學會就職典禮的演詞頂檔一天，其實還在爬格子，做電台節目，為的也是同樣一份使命感而已。
豐盛金融資產管理董事 黃國英（作者為註冊持牌人士）