內地電商鬥到七國咁亂，創業者要生存就要有大靠山，如果唔係就只會畀大企業「通吃」。
好似專搞旅遊網上訂票嘅同程網就泊到好碼頭，畀科網巨人騰訊（00700）睇中，仲牽頭入股大嗱嗱五億人仔，隨時有力挑戰網上訂票老大攜程網！
同程網今次搵到騰訊呢座靠山，都可算捱出頭來，不過佢嘅創辦人吳志祥自言創業過程好辛酸，尤其面對規模比自己大十倍嘅攜程網，壓力真係唔講得笑。
佢仲話，同程網除咗做訂機票同酒店之外，做門票特別出色，亦因為咁就惹嚟攜程網嘅「關注」。咁就死喇，仲唔Mark到你實一實咩。
佢話攜程網一直想喺同程網挖走人才，舊年底仲索性喺公司對面租埋辦公室，擺明車馬撬人。
所以吳志祥都奉勸想喺電子商貿大展拳腳嘅公司要保持危機感，千祈唔好引起巨頭嘅「關注」，否則好難有好日子過。
其實佢呢番話正好反映內地電子商貿嘅競爭，已經係弱肉強食嘅境地，如果唔跟番個好似騰訊咁嘅科網大佬，遲早好似汪洋中嘅魚毛，畀大魚食咗。
余絲韻