「紅魔鬼」曼聯前年離棄香港，揀咗紐交所上市，令香港粉絲好失望，不過「紅魔鬼」似乎都唔係好捨得香港嘅「錢途」，近日刊登招聘廣告，話要請分析員研究香港嘅商機喎，今次開大定開細，就要拭目以待喇。
絲絲睇過份招聘廣告嘅要求，結論係你唔一定要識踢波，識做市場研究就得！英超球隊曼聯香港辦公室，要請全職研究分析員（Research Analyst），雖然得三個月合約，但就講明表現好的話，有機會轉做長工。
呢個職位主要發掘亞太區業務商機，負責寫行業環境和分析報告、建立數據庫和研究流程咁。公司要求應徵者大學畢業，最好主修工商管理、分析力好、懂英語及亞洲語言等。
曼聯隊波呢排表現一般，唔緊要，最重要係對住中國球迷個荷包瞄得好準就得架喇，好多分析都話，內地人依然係消費品市場嘅樁柱，喺香港就最容易吸佢哋啲金，絲絲就認為，所謂發掘亞太區業務商機，咪即係賺人仔囉！話唔埋香港會愈嚟愈多紅當當嘅精品店、Cafe。
內地傳媒去年底傳出曼聯接洽多間遊戲商，向佢哋發出邀請函，好大機會要搵個官方社交遊戲合作夥伴，消息一出即時炒起多隻網遊股。今次仲喺香港請埋分析員，睇嚟好認真搵錢喎。
余絲韻