阿里巴巴集團創辦人馬雲嘅創業故事，大家可能聽得多，但馬雲背後嘅女人，即係佢嘅老婆張瑛，又點睇呢個作為科網巨人嘅丈夫？
原來張瑛係馬雲大學同學，佢哋一畢業就拉埋天窗。張瑛話，「馬雲不是帥男人，看中他是因為他能做很多帥男人做不了的事情。」不過，就正因為咁，婚後張瑛曾長時間生活喺惶恐之中。
鬼主意多多嘅馬雲拉埋原本做教師嘅老婆一齊辭職搞阿里巴巴，點知係「呃」老婆喺屋企做煮飯婆，提供有品質保證嘅伙食畀開會員工。而張瑛更爆料話佢哋屬於九十後嘅囝囝當年曾因為父母忙爆唔得閒理，搞到似足阿爸成個火柴人咁樣，十幾歲開始喺網吧打躉做宅男添！
馬雲情急下叫張瑛即刻辭職「陪太子讀書」，老婆當然唔忿氣：「名成利就就讓我回家做全職太太，他拿我當甚麼？一顆棋子！」
張瑛辭職之後，兩夫婦即刻對沉迷打機嘅囝囝出招。「廿四孝媽咪」張瑛唔止管接管送，仲親自下廚煮愛心餐，更加會送飯去學校畀囝囝。半年後，佢就由宅男變番陽光少年添！
雖然科網同行紛紛推網遊賺錢，但馬雲冇跟風，仲喺董事會話：「我不會在網遊上投一分錢，我不想看到我兒子沉迷在我做的遊戲裏！」
余絲韻