Market Insight：水務股輪流落鑊

展望一四年，中國企業面對三高形勢（高匯價、高息口及高負債），抑或美國經濟復甦對新興市場產品及服務需求回升的幫助較大，由A股連續四年跑輸全球主要股市，去年仲反牛市之潮流，跌近7%。

具前瞻性的滙豐中國製造業PMI數據，上月中小型規模企業已在50盛衰線樓下，內地經濟復甦得嚟，總係比投資者有點「虛」之感覺。

古勝冇點你2014/01/03

萬里長空

港股昨升33點報23,340點，跨年連升六日，可惜成交極奀，未夠五百億元，估計最快要到下周一，更多賓架陸續放完假返工，後市係龍係蛇先見真章。

資金入市相當揀擇

但睇見藍籌仲算升多過跌（24升21跌），可是國指已經率先走樣，40隻成分股32跌得8升，重磅的內銀同內險股統統見紅，一四年紅盤高收的恒指，算係攞過意頭，整體後市真係睇佢唔透，尤其見到一星期SHIBOR（人仔拆息）由聖誕前高位8.84厘撻番落昨日4.98厘，但見滬綜指不為所動，內地個市有種講唔出的詭異。

內銀、資源、工業及電訊股短期有反彈無大升，拖累成個大市氣氛，至少恒生指數升得有點拉牛上樹之感。

不過，古勝個人認為，目前個市氣氛其實一啲都唔差，只係資金相當揀擇，對傳統產業無乜興趣，集中在受惠於新消費模式，或者國策傾斜的新經濟股。去年，科網股、博彩股有反地心吸力裝置，昨日騰訊（00700）收市終於企穩500元樓上，昨日資金明顯熱炒無蟹貨攔路的半新股、彩票及環保類股份。

中滔環保（01363）、新環保能源（03989）、天津創業環保（01065）、中國電力新能源（00735）升幅都超過一成，光大國際（00257）、京能潔能（00579）、北控水務（00371）同中國水業（01129）升幅亦介乎1.6至9.8%，似乎但凡個名有節能、新能源、水務以至燃氣，都見資金捧場，懶理到底值定唔值。

中國水務穩打穩紮

有趣是，業務透明度唔低，業績亦都穩打穩紮的中國水務（00855），昨日好似畀人點穴一樣，原地踏步收報2.87元。公司主營業務包括興建及經營水務設施，供水、污水處理、供水網絡建設都有所涉獵，自○四至一三年期間，公司供水規模由3萬立方米，升至448萬立方米。過去三年，針對旗下的二至四線城市，單位耗水量年複合增長約8.1%。

中央傾向以調高水價，以反映送水成本的上升，亦達到減低水資源浪費的目標。最近，全國多個城市都醞釀加水價，部分預期升幅更達到兩成五。至於污水處理項目上，去年七月，分別購入廣東新晟環保及邯鄲成晟水務34%股權，染指天津、北京及河北等地的污水處理項目，令現有污水處理能力升近一倍。

電池股有機會發圍

綜合大行預測，中國水務一四年賺3億元，每股盈利0.183元，預期市盈率15.6倍，以○九年估值介乎15至30倍之間上落，現正處下限，或者與中國水務發展較成熟，業績沒有爆炸性有關。不過，既然熱錢有理無理湧入相關板塊，中國水務2.8至3元入貨風險有限，假如再有污水處理項目的收購落實，或者會成為股價催化劑，最多短期輸在唔跟升，唔怕守株待兔可以諗佢。

長假前電池股炒過一轉，昨日則以整固為主。呢個板塊去年因為受制於行業整頓期，冇大炒過。不過，仍留得在市場的大型業者，捱得過場淘汰賽，自有新天地。若今年內地新能源汽車銷售有突破，呢個板塊亦有條件追落後。

較熱門選擇可留意超威動力（00951），天能動力（00819）走勢較弱，想搵細價的冷門之選，則可留意染指電動車項目的中聚電池（00729）。

古勝