絲絲講場：新地獎學金惠及內地員工
新鴻基地產（00016）一○年起設立「新地集團員工子女本科獎學金」，資助基層員工子女修讀全日制學士學位課程，新地主席兼董事總經理郭炳聯帶來喜訊，今年已將計劃擴展至內地員工子女。
據佢講，呢個計劃推出至今四年，合共已資助37名學生，今屆一共有九個本港同埋四個內地員工子女獲獎學金。郭炳聯早幾日仲親自嘉許獎學金得主，寄語獲獎學生畢業後要回饋社會。郭炳聯又同佢哋分享成功之道，鼓勵年輕人要勇於承擔，積極面對困難，千祈唔好輕易言敗。
得獎學生志願救人
要攞呢個獎都唔易o架，獲獎者係由評審委員會根據多項準則，包括學生家庭財務狀況、公開試及校內成績等甄選出嚟。其中一名獲獎學生羅啟聰，佢嘅媽媽喺新地任清潔工，佢話會修讀護理系，希望他日能夠喺急症室或手術室工作，第一時間拯救傷患者。喺新地任職司機嘅余漢光更加係一門雙傑，兩名女兒先後獲得新地獎學金升讀大學，其中一名女兒余泳忻入讀醫療化驗。
余絲韻