絲絲講場：郭志樑揸帆船再揚威
永安國際（00289）主席郭志樑（Karl Kwok）一向鍾意玩帆船，最近佢聯同兩名華人，駕駛「Beau Geste號」出賽，攞到第五名，Karl喺九七年首次參加呢個賽事，仲成為第一個贏得悉尼至荷巴特帆船大賽嘅亞洲隊伍。
九七年首次參賽奪冠
今次佢哋嘅成績係兩日十五小時十分四十五秒。今次比賽係第二次由華人掌舵並殺入前五名。早喺九七年，Karl首次出征同項賽事，當時更已成功奪冠，今次就係第二次由華人掌舵殺入前五名。
永安百貨係華資百貨「四大公司」之一，由郭家經營，Karl係郭家後人，郭家則以第一代嘅郭泉、郭樂兩兄弟喺澳洲經營果欄為始。及至一九○七年，兩兄弟回港創立永安百貨。
低調商家活躍體育界
郭家其後仲進軍保險、銀行及地產業務，並喺一九七三年將呢啲業務以永安人壽名義上市，其後易名永安集團，擁有永安國際。Karl喺八五年接替堂兄郭志權，出任永安國際主席。
永安國際最重要嘅業務當然係百貨及物業，Karl同郭家其他成員一樣，作風好低調，但喺體育界就相當活躍。佢唔止鍾意揚帆出海，仲做埋香港帆船運動總會會長、中國香港體育協會暨奧林匹克委員會副會長及香港體育學院董事局成員。
余絲韻