證監會喺一○年首次試行「神秘顧客計劃」，目的係睇吓金融機構喺銷售投資產品時，有冇跟足指引，以免發生「奪命金」事件，證監會中介機構監察科高級總監浦偉光尋日話會第二度推行「神秘顧客計劃」，各位從業員要打醒十二分精神喇！
話明係神秘顧客，監察人員就緊係扮鬼扮馬去考下佢哋，仲會將整個銷售過程錄音，記錄財務策劃師嘅銷售手法。
浦偉光話，當年聽到錄音後都感到好愕然，「有銷售人員可能為咗快啲完成交易，連基本客戶資訊都無拎到，喺推銷產品特性或風險時出現錯漏，亦都冇針對客戶嘅需要，為佢哋挑選合適嘅投資產品。」
尋日舉行嘅財務策劃師會議，佢趁機通水，提醒前線銷售人員應做好基本銷售要求，「『經證監會審批後嘅投資產品係無風險』呢句說話係錯嘅，唔可以再講！」佢話叫大家要打醒十二分精神 ，「可能出年你嘅客戶就係監管人員！」
其實依家有外國銷售公司已由佣金制改為底薪制，激勵管理階層，佢呼籲本地公司借鏡。而隨住互聯網普及，網上出現愈來愈多投資產品供買賣，業界利用社交媒體招攬客戶時，千祈唔好忘記銷售基本要求同指引呀。
余絲韻