不嬲語出驚人嘅丹麥投資銀行Saxo Bank發表二○一四年驚世預言。該行今年不忘喺份報告度補句「成真嘅機會率一向都低」試圖去打圓場，但絲絲覺得惹火程度更勝往年，因為佢話歐元區未來會墮入前蘇聯嘅極權制度，危機將會喺出年五月底，即係歐洲議會進行大選嗰陣開始發酵！
Saxo Bank首席經濟師雅各布森解釋，歐盟委員會第日眼見歐元區通脹率無法回升，加上經濟增長持續緩慢，會成立一個「工作小組」，想方設法向儲蓄超過10萬美元嘅人徵收不同款式嘅稅，企圖用呢種「劫富濟貧」手段解決經濟困境，久而久之，當地人嘅私有產權同個人自由就會統統凍過水。
另外，由於歐盟裏面「疑歐情緒」會逐漸高漲，英國、荷蘭等地疑歐派嘅政黨愈嚟愈受選民支持，第日歐洲議會過半數議席都由呢啲人穩坐，導致歐洲政壇「七國咁亂」，拖累經濟。
其他驚人預測仲有：出年德國同美國齊齊苦於加息同收入增長停滯，經濟陷入零增長；油價亦因供應過剩跌到每桶80美元。而亞馬遜、Netflix、Twitter等美國科企嘅股價會大幅下挫！
雖然Saxo Bank發表呢類預言從來都不求準確，純粹希望大家唔好忽略「黑天鵝事件」，不過小妹覺得，有多個角度思考都唔係一件壞事啊！
余絲韻