阿里巴巴集團主席馬雲鍾情耍太極就好多人知，不過，原來佢對傳統書畫都有研究，最近仲宣布創作出佢第一幅嘅「馬體」作品，計劃喺今個星期四擺上淘寶拍賣，收到嘅錢就會捐出來做慈善。
對於馬雲呢幅唔知係書法定係國畫嘅大作，內地網民相當之捧場，有人話有「太極乾坤，峰迴路轉」嘅意境，估最後成交價會有6位數，不過，都有網友買定保險，問清楚買咗之後，係咪可以享受淘寶嘅「七天內無理由退款」？
講到「馬體」，原來喺馬雲六、七歲嘅時候，因為佢爸爸好鍾意傳統書畫，逼住佢每日食完晚餐之後就要開始練毛筆字。見到其他同學仔玩緊嘅時候，自己要練啲覺得將來冇用嘅嘢，小朋友心情當然唔多靚，而結果就令佢練成咗今時今日嘅「馬體」。
根據馬雲講解，「馬體」嘅最大特色就係保持住40年無進步，整體狀態仍然停留喺六、七歲嘅水準，仲要帶住濃郁嘅鬱悶、埋怨、嚮往自由同逃出牢籠嘅感覺。
馬雲話「馬體」同佢嘅樣一樣好有特色，想整容整成靚仔容易，整成佢咁嘅樣幾乎係無可能嘅事。而呢幅「馬體」作品都肯定絕對獨一無二，佢好肯定唔會有第二個人可能畫出完全一樣嘅畫作。講到咁特別，搞到絲絲都好有興趣想知道個拍賣結果，唔知馬雲最後可唔可以搵到佢書畫上嘅知音呢？
余絲韻