打機迷等到頸都長嘅SONY最新型號遊戲機PlayStation 4（PS4），終於喺今個月趁聖誕零售黃金檔期前率先推出，已有100萬人預購，絲絲聽聞PS4初期銷情咁理想，由大學生團隊研發嘅PS4遊戲《Octodad：Dadliest Catch》居功不少。SONY為扭轉遊戲業務轉虧嘅危機，已經決定改變策略，主動向小型獨立遊戲研發者招手喎。
《Octodad：Dadliest Catch》嘅創作班底係芝加哥德保羅大學（DePaul University）一位大學教授同埋佢班學生，呢個荒誕奶爸模擬遊戲，玩家要努力控制八爪魚奶爸嘅身體，等八爪魚木偶表現得似足人樣，如果唔小心畀家人知道你其實係假扮人類，咁就會Game over，聽落都幾別開生面兼得意過癮。
研發呢個遊戲嘅教授Philip Tibitoski就話，SONY明白到獨立遊戲研發商有更大嘅創作空間，研發出多元化嘅遊戲。
難怪SONY依家咁積極搵外援合作，提供軟件支援同資助，希望可以搞搞新意思，透過有趣遊戲掀起熱潮，刺激PS4銷路，以對撼微軟同期推出嘅Xbox One。
余絲韻