美國《財富》雜誌本年度50位商界風雲人物榜又出爐喇，今年一共有四位中國企業家上榜，人數歷來最高，當中排名最高嘅就係第三位嘅騰訊（00700）主席馬化騰，僅次於冠軍Tesla行政總裁馬斯克（Elon Musk），以及第二位嘅一眾維權投資者。
馬化騰係內地首位企業家打入呢個商界風雲人物榜嘅三甲位置，《財富》雜誌更加形容馬化騰先用QQ征服內地市場，依家再將目光放到海外，唔單止喺國際市場積極推廣微信，仲開始競購美國相片分享服務商Snapchat股份等等海外發展大計，佢可能已經成為中國科技界最有影響力、最有權力嘅一位企業家。
而騰訊今年股價表現亦非常理想，一月以嚟飆升61%，躍升成內地最有價值嘅民營企業，市值超過950億美元（約7,410億港元），如果由騰訊○四年上市開始計起，股價上漲近10,000%（即100倍）添，令馬化騰搖身一變成為中國科技界身家最高嘅企業家之一，估計淨資產高達100億美元。
雖然馬化騰喺內地科技界叱咤風雲，但佢一啲都唔自滿，佢喺內部演講時強調，騰訊要主動求變、主動應招，希望團隊嘅工作氣氛「非常飢渴」，「要有激情、要好學、要開放」，希望員工成為「闖二代、創二代」，帶領騰訊繼續發展。
余絲韻